ЛъагапIэщIэхэм хуэкIуэу

Бэрбэч Хьэт1ут1э и ц1эр  зезыхьэ  Къэбэрдей-Балъкъэр  къэрал  университетым  нобэ  къызэщ1еубыдэ институту  10, зы  факультет, колледжу  4. Студенту  щеджэм я  бжыгъэр  мин  18-м  нос. Ахэр  зэрырырагъаджэ  программэхэм  я  бжыгъэр  мэхъу  320-рэ. Апхуэдэу я щ1эныгъэм,  я  къэухьым  зезыгъэужь,  хэзыгъахъуэ программэ  зэхуэмыдэхэр 1300-м  щ1егъу.  Абыхэм  я нэхъыбап1эр ди  зэманым  лэжьап1э  1энат1эхэр зыхуэныкъуэ  1эщ1агъэл1хэм  сэбэп  къахуэхъунущ.

Университетым  щы1эщ  егъэджак1уэу,  1эщ1агъэл1  зэхуэмыдэу мини  2-м  щ1игъу. Студентхэм  щ1эныгъэ  егъэгъуэтыным  толажьэ ц1ыху  800-м  щ1игъу,  абы  щыщу  130-р  щ1эныгъэхэм  я докторщ,  450-м  нэблагъэр  кандидатщ. Диссертацэ  лэжьыгъэхэм  хэплъэу  щы1эщ  совету  6. Ахэр  хуэгъэзащ  1эщ1агъэ,  унэт1ыныгъэ  зэмыл1эужьыгъуэу  9-м. Еджап1э  ищхьэм къыщыдок1 журналу  4, абы  щыщу  т1ур  къэралым  и  аттестацэ комиссэм  и  сатырым  хэтщ.

Зэрыгуры1уэгъуэщи Ищхьэк1э къыжыт1а бжыгъэхэр зи1э университетым ехъул1эныгъэ и мащ1экъым. Иужьрей зэманым университетыр зэреф1ак1уэм гу лъызыта адэ анэхэм я быныр къалэшхуэхэм щырамыгъаджэу я джабэ щ1эсыжу 1эбэм ягъуэту ди университет щ1агъэт1ысхьэмэ  нэхъ къащтэ хъуащ. Абы щеджа щ1алэгъуалэрщ ди республикэм дяпэк1э и зыужьыныгъэм телэжьэну дызыщыгугъыр, ди лъэпкъым и 1уэхур дэзгъэк1ыну дызыпэплъэр. Еджап1эшхуэм иригъэк1уэк1 лэжьыгъэхэм къыптхуепсэлъыхьыну ди нэтыным къезгъэблэгъащ, Къэбэрдей Балъкъэр университетым и ректор Алътуд Юрэ.